föstudagur, mars 17, 2006
Ég var mikið búin að velta fyrir mér hvaða rönd þetta væri sem kom niður undan listanum í loftinu. Þetta var beint fyrir ofan skrifborðið hjá mér og þegar ég leit upp, svona til að hugsa eitthvað kreatívt, blasti þessi rönd alltaf við. "Einhver helvítis drullan" hugsaði ég og prófaði að fara með ryksuguna á þetta. Röndin minnkaði við það, en nokkrum dögum seinna var hún orðin jafnlöng aftur, svona ca. 10 cm. og lengdist með hverjum deginum. Í morgun var þetta farið að nálgast 20 cm. og ég sá að við svo búið mátti ekki standa. Sótti háan koll, klifraði upp og gerði enn eina óvænta uppgötvun: röndin sýndi sig vera bústaður (eða kannske úrgangur?) pínulítilla hvítra maðka sem iðuðu þarna í kring!! Lue lét sér fátt um finnast og sagði mér að nota vélin á þetta og þar átti hún við ryksuguna! Mér fannst nú eiturbaukurinn vera vænni kostur og þar var ekkert til sparað! Afhverju maðkarnir völdu sér þennan stað til búsetu er mér hulin ráðgáta.
Nú eru maðkarnir allavega farnir, en eftir stendur eitt vandamál: Á ég að vista þessa mynd undir möppunni "dýralíf", eða undir möppunni "Lífið heima"!!!
Hafið góðan og ma(ð)kalaust skemmtilegan dag!! KNUS
