Svava í Arnarfelli

Það er sagt að "julen varer lige til påske" - en svo kemur á eftir: "nej det ikke sandt nej det ikke sandt..."!! Hverju á maður að trúa? Í dag sátum við Sigfús og opnuðum jólakort og ég fékk meira að segja eina jólagjöf!! Þetta ber nú ekki að skilja sem að hjá okkur séu "eilíf jól", heldur kom Hafdís með póst frá Kajanum og Frakka og þar á meðal var fullt af jólakortum. Voða gaman! Fólk veit náttúrulega ekkert hvert á að senda okkur kortinn, slíkur er þvælingurinn á okkur. En hafið hjartans þakkir, allir þið sem lögðuð á ykkur að skrifa okkur jólakort. Svo fékk ég pakka frá Palla og fjölskyldu í Roskilde, mánaðardag með myndum af Silju og nafna mínum, þessum elskum! Sómir sér vel í eldhúsinu á Taylor Road. Kærar þakkir, mikið sem mér þótti vænt um þetta.
Um hádegið á morgun lendir á Montego Bay flugvelli vél full af Íslendingum. Heimsferðir eru með tvær ferðir hingað og mér skilst að það sé fullt í báðar. Skil það svosum vel! Tvær systur mínar úr rauðvínsstúkunni notuðu tækifærið og ákváðu að skella sér með, og ætla að vera hjá mér í rúma viku. Það verður sko gaman! Ætla að mæta á völlinn á morgun með íslenska fánann! Svansa frænka mín og Ninni eru líka með, þau verða á hóteli stutt frá MoBay. Hlakka mikið til að sjá þau öll.