Svava í Arnarfelli

"Varnir Íslendinga tryggðar" - segir Mogginn í dag um samstarf Íslands og Danmerkur í öryggis og varnarmálum. . "Amerikanerne er skredet" segir danska ríkisútvarpið um sömu frétt og ekki er laust við að hlakki í dönum. "Þið gátuð sumsé ekki klárað ykkur án okkar eftir allt saman" - er undirtónninn! En er þetta ekki miklu eðlilegra en að Bandaríkjamenn séu að djöflast upp á Keflavíkurvelli? Mér finnst voða gott til þess að vita að Íslendingar eru á svo margan hátt farnir að líta meira og meira til Norðurlandanna á kostnað fyrri (óskiljanlegrar) áráttu fyrir öllu sem amerískt er. Sé þetta líka í mínu fagi, fyrir 10-15 árum þótti engin vera hjúkrunarfræðingur með hjúkrunarfræðingum nema hafa farið í nám í Bandaríkjunum. Nú er öldin önnur í orðsins fyllstu merkingu og fleiri og fleiri hjúkrunarfræðingar sækja framhaldsmenntun til Danmerkur, Svíþjóðar og Noregs. Enda er ekki svona svakalegur menningarlegur munur þar á milli. Gott mál og ég er viss um að Danir passa vel upp á okkur!

Enn er sami rembingurinn í veðrinu hérna á Jamaica, hávaðarok og læti. Ég veit ekki hvað er í gangi! Þetta hefur m.a. áhrif á rafmagið sem er voða óstabílt, kemur og fer, kemur og fer. Getur verið svolítið pirrandi þegar ég er að vinna á tölvuna og allt í einu verður allt svart!

Það gengur á ýmsu í vegargerðinni hjá Sigfúsi, mikið grafið og mokað, mikið ryk og mikill skítur! En mangósalarnir láta það nú ekki á sig fá, stilla mangóskálunum upp á bílhræin sín og hreyfa sig ekki úr stað þrátt fyrir að vinnuvélarnar séu á fullu við hliðina á þeim. Enda er þetta þekkt mangósölusvæði þarna í vegkantinum og hvert ættu þeir svosum að fara?

Hafið góðan dag elskurnar!