Svava í Arnarfelli

Bara rétt að láta heyra frá mér - sit á Kæjanum á Christianshavn og velti fyrir mér hvort vogandi sé að hætta sér út úr húsi. Maður getur átt von á að fá gusu af táragasi í andlitið eða stein í hausinn! Brjálæðið í borginni hefur verið algjört síðasta sólarhringinn, Á Christianshavn sem -að öllu jöfnu er hinn friðsælasti staður - var allt vitlaust í gærkvöldi.

Þessa mynd fékk ég "lánaða" af heimasíðu TV2, þarna liggja brennandi bílar á götu hérna rétt hjá mér. Ástandið í Kaupmannahöfn líktist helst því sem maður hingað til þekkir aðeins úr fréttum frá stríðshrjáðum löndum, götumyndum frá Írak eða Beirut. Og þetta er hérna í Kaupmannahöfn, hérna í Danmörku þar sem við búum í svokölluðu siðmenntuðu þjóðfélagi. Yfir 1000 ungmenni (eða hvað? Einn sá fyrsti sem var handtekinn í gær var 38 ára!) gengu berserksgang, köstuðu steinum og bensínsprengjum, veltu og kveiktu í bílum, söfnuðu drasli og kveiktu bál á götunum, eyðilögðu eignir annarra og reyndu að slasa aðrar manneskjur. Og allt vegna þess að þau voru svo "frustreruð" yfir því að borgaryfirvöld vilja ekki gefa þeim hús til safnast saman í. Er þetta ekki með ólíkindum? Það vantaði ekkert upp á orku og dugnað þessarra krakka þegar þau voru að draga húsgögn, gáma og annað til að henda á bálið, ýta bílum og velta þeim á miðri götunni og bera að níðþunga kassa með steinum fram og aftur. Þessi orka ætti að geta nýst í eitthvað uppbyggilegra. Og svo er verið að tala um að það sé hættulegt að vera á Jamaica!!
Nú virðist vera ró yfir, krakkarnir eru sjálfsagt að sofa úr sér baráttu"rúsið" frá í gær og safna orku fyrir næstu atrennu. En eflaust heldur þetta áfram, þau hafa ekkert annað að gera og eru sjálfsagt ennþá voða "frustreruð" yfir að enginn vill gefa þeim hús.